Tittel på prøveforelesing: "Kva moglegheiter og barrierar er der for sjølvstendet til pasientar og medborgarskap i ein recovery prosess frå rusmiddelbruk både i og etter døgnbehandling? Gi gjerne både empiriske og teoretiske døme på dette."
Disputas
Doktoranden vil offentleg forsvara avhandlinga kl. 12.00.
Komiteen
- Førsteopponent: Professor Stian Biong, Universitet i Sørøst-Norge
- Andreopponent: Professor Vibeke Asmussen Frank, Aarhus universitet
- Leiar av komiteen: Førsteamanuensis Therese Saltkjel, OsloMet – storbyuniversitetet
Leiar for disputasen er dekan Oddgeir Osland, Fakultet for samfunnsvitskap, OsloMet – storbyuniversitetet.
Rettleiarar
- Professor Amy Østertun Geirdal, Institutt for sosialfag, OsloMet – storbyuniversitetet
- Professor Trond Nordfjærn, Institutt for psykologi, Norges teknisk-naturvitenskapelige universitet - NTNU
Samandrag av avhandlinga
Dei fleste som har utfordringar med rus, klarer å overvinne desse utan hjelp frå det formelle hjelpeapparatet. Men personar med rusavhengigheit opplever sammensette og omfattande psykososiale utfordringar, og har vanlegvis behov for formell hjelp for å meistre endring på fleire område i livet. Denne avhandlinga har som mål å bidra med kunnskap om psykososiale faktorar som påverkar pasientar si meistring i overgangen frå døgnbehandling for rusavhengigheit til kvardagen etter utskriving.
Overgangen frå døgnbehandling til tida etter utskriving er utfordrande for mange, og eit sentralt føremål med døgnbehandlinga er å motverke tilbakefall til tidlegare livsstil og bidra til langsiktig endring og meistring.
Avhandlingsarbeidet har blitt utført gjennom ulike metodar, inkludert systematisk oversikt, fokusgruppeintervjuer, evalueringsstudie og spørjeundersøking. Gjennom arbeidet har ein kartlagt ulike faktorar som kan bidra til meistring, inkludert psykisk velvære, sosial deltaking og reduksjon i bruk av rusmiddel. Studien har også lagt vekt på andre meistringsfremjande faktorar, som tilhørighet, motivasjon og føreseielegheit.
Resultata frå studien har vist at fleksible og individuelt tilrettelagte tenester, som gir pasientane valfridom og moglegheit til å medverke i løpet av behandlingsforløpet, kan styrke meistringa. Studien har også vist at slike intervensjonar kan ha positiv innverknad på tilsette si arbeidstilfredsheit.
Samla sett bidrar avhandlinga med kunnskap om mestringsfremjande faktorar for pasientar i overgangen frå døgnbehandling til tida etter utskriving, kunnskap om kva intervensjonar som kan styrke mestringsfremjande faktorar, og kunnskap om korleis mestringsfremjande intervensjonar kan påverke tilsette si arbeidstilfredsheit. Dette har betydning for korleis overgangen mellom tenestenivå kan planleggast i samarbeid med pasientane, og for korleis praksisfeltet kan møte den enkelte pasient sine ønskjer og behov.
