Arbeidsplassar i helse- og omsorgssektoren: Kjønn, klasse, etnisitet

I Noreg, som i andre rike land, har auka etterspurnad etter helse- og omsorgspersonell ført til ei aukande rekruttering av innvandrarar i denne sektoren, og dette var tema for forskingsprosjektet.

Det er sparsamt med undersøkingar som klargjer betydningar av ein såkalla fleirkulturell arbeidsarena, når det gjeld organisering og arbeidsrelasjonar. Siktemålet var å klargjere organisering og rekruttering av ein i aukande grad fleirkulturell sektor så vel som dagleg samhandling og kommunikasjon på arbeidsplassen, og dessutan samspelet mellom desse nivåa.

Gjennom ein kvalitativ feltstudie i to arbeidskontekstar (ei sjukehusavdeling og ein sjukeheim) vart det fokusert på korleis etnisitet inngår i dei eksisterande profesjons- og kjønnshierarki.

Relevante analytiske kontekstar var migrasjon og den nye arbeidsmarknaden, med globalisering som eit meir generelt bakteppe. Teoretisk bygde  undersøkinga på profesjonssosiologi, arbeidslivssosiologi og kvinne- og kjønnsforsking, og dessutan migrasjons- og etnisitetantropologi.