Prosjektet skal auka kunnskapen om brukarstyrt behandling og bruk av digitale verktøy i oppfølginga av pasientar med diabetes type 1 ved ein endokrinologisk poliklinikk.
Kunnskapen skal bidra til at tenestene ved Ahus blir utvikla i samsvar med behovet til pasientane for støtte til eigenbehandling og ønsket til poliklinikken om å gi fleksibel og behovstilpassa oppfølging.
Gjennom prosjektet ønskjer me spesielt å få kunnskap om
- tilfredsheita til pasientane med å bruka den digitale løysinga
- moglege forskjellar mellom pasientar som er interesserte i digital oppfølging og dei som ikkje er det
- betydninga av brukarstyrt digital oppfølging for helsa, livskvaliteten og eigenmeistringa til pasientane
- korleis både helsepersonell og pasientar utnyttar moglegheitene i den digitale løysinga
- korleis innhaldet i den digitale løysinga kan bli vidareutvikla
- ressursbruk relatert til brukarstyrt digital oppfølging
Det tette samarbeidet mellom forskarar og praksisfeltet står sentralt i prosjektet, og brukarmedverknad med involvering av både tilsette og pasientar har vore viktig i både førebuingane og gjennomføringa.
Prosjektet er eit samarbeid mellom Akershus universitetssjukehus (Ahus) og OsloMet.
Prosjektdeltakarar
Meir om prosjektet
Nye digitale løysingar opnar moglegheiter for å leggja til rette for fleksibel og behovstilpassa oppfølging og har potensial til å bidra i utviklinga av ei berekraftig helseteneste.
I 2021 vart ei digital appbasert løysing med dette formålet teke i bruk på endokrinologisk poliklinikk på Ahus i oppfølginga av pasientar med diabetes type 1.
Dette prosjektet har som formål å evaluera det nye digitale tilbodet og identifisera eventuelle behov for vidare utvikling.
Til prosjektet rekrutterer me både pasientar og helsepersonell ved poliklinikken. Pasientar som ønskjer å vera med i studien får tilsendt eit spørjeskjema ved to måletidspunkt med eitt års mellomrom. Dette er for å kunna undersøkja eventuelle endringar over tid.
I tillegg vil me gjennomføra observasjonar av konsultasjonar og individuelle intervju med både pasientar og helsepersonell for å utforska tilfredsheita med den digitale løysinga.
Resultata vil ha innverknad på tenestene som blir gitt ved endokrinologisk poliklinikk på Ahus og sikre at løysinga blir utvikla i tråd med behova til både klinikken og pasientane.
Prosjektet vil også bidra til kunnskap om digitale verktøy i oppfølginga av pasientar med diabetes type 1.
