OsloMet får master i kunstterapi

– Institutt for estetiske fag er veldig glade for endeleg å kunne tilby master i kunstterapi, fortel instituttleiar Liv Dahlin ved Institutt for estetiske fag ved OsloMet.

Studiet blir tilbode som ei studieretning på det eksisterande masterstudiet i estetiske fag.

– Vi ønskjer at fleire skal få sjansen til å fordjupe seg i dette viktige fagområdet. For tida finst det ikkje masterprogram i kunstterapi i nokon av dei andre nordiske landa. Dette har medført at studentar har reist til andre europeiske land for å få ein mastergrad i kunstterapi, fortel ho.

– Vi er svært stolte av at studiet har i seg eit høve til å svare på framtidige behov innan psykisk helse, understrekar Dahlin.

Frå før omfattar masterstudiet i estetiske fag fire studieretningar med ulike opptakskrav: kunst i samfunnet, mote og samfunn, teater i samfunnet, kunst- og designdidaktikk.

Eit viktig tillegg

Kunstterapi nyttar skapande arbeid med bilete som kommunikasjon og tilnærminga blir brukt til å fremje mental og fysisk helse.

– Kunstterapi er ein tverrfagleg profesjon som har som mål å førebyggje eller rehabilitere ulike psykososiale og helsemessige plager ved å bruke kunst i den terapeutiske relasjonen, forklarer professor Mimmu Rankanen ved Institutt for estetiske fag. Ho er fagleg ansvarleg for den nye studieretninga.

 – Slik er kunstterapi eit viktig tillegg til dei meir tradisjonelle sosial- og helseintervensjonane og eignar seg for menneske med ulik kulturell bakgrunn og frå ulike aldersgrupper. I ei tid med mange kriser er kunstterapi ein svært eigna metode i arbeid med traume. Den kan også brukast i skular og i spesialundervisning.

– I kunstterapi lagar ein person eller ei gruppe kunst og reflekterer over verket med utgangspunkt i eige liv. Kunstterapeuten tek seg av prosessen og gjer at deltakarane kjenner seg trygge til å utforske, forstå og endre ulike aspekt i livet sitt og slik betrar psykososial helse, trivsel eller livskvalitet.

Førebels er kunstterapi mest brukt i ulike former for psykiske helsetenester. Og det er i aukande grad vekt på medikamentfrie behandlingsformer og samfunnsbasert omsorg.

– Det er derfor viktig å utvikle, bruke og forske på effekten av komplementære behandlingsmetodar, slik som kunstterapi, understrekar Rankanen.

Kunstterapi blir også nytta innan somatisk helsevesen, og internasjonalt er det god forskingsevidens og praksis for å bruke kunstterapi mellom anna som eit tillegg til kreftbehandling.