Forskingsrådet lyste i fjor haust ut midlar til å etablere forskarskolar, der det blei lagt særleg vekt på relevansen for eit breiare arbeidsliv og at forskarskolane skal samarbeide med ein eller fleire verksemder frå næringslivet eller offentleg sektor.
Gjennom forskarskolane skal stipendiatar ha tilgang til doktorgradskurs av høg vitskapleg kvalitet, og fagleg nettverk og forskarfellesskap.
OsloMet har no fått tilslag på éin forskarskole som skal koordinerast frå Fakultet for helsevitskap. Prosjektet "Partners-in-Care: Municipal Health Care Research and Innovation School" har fått 16 millionar kroner.
Dekan Marit Kirkevold ved Fakultet for helsevitenskap. Foto: Sonja Balci / OsloMet
– Denne tildelinga er vi spesielt glade for og stolte av, seier Marit Kirkevold, dekan ved Fakultet for helsevitskap.
– Forskarskolen skal utviklast og drivast av eit sterkt konsortium av kommunar og universitet og høgskolar rundt om i Noreg. Målet er å utvikle kunnskap, kompetanse og innovative metodar på tvers av kommunesektoren og akademia slik at vi saman kan bidra til å løyse dei store utfordringane som helse- og omsorgstenestene står overfor i åra som kjem, seier ho.
Prorektor gratulerer
– Gratulerer så mykje til dekan Marit Kirkevold og fagmiljøet ved Fakultet for helsevitskap med å ha nådd gjennom med ein spennande søknad, seier prorektor for forsking og utvikling, Tanja Storsul.
– Dei siste vekene har vi snakka mykje om den gode utviklinga i forskingsverksemda ved universitetet, og då kjem denne nyheita som ei gledeleg fortsetting på historia, seier ho.
Partnarar i tre forskarskolar
OsloMet deltar i tillegg som partnarar i tre av dei andre forskarskolane som har fått tilslag:
- UIT – Noregs arktiske universitet koordinerer prosjektet "MiMa:Microbiology matters-novel approaches to tackle future health challenges"
- Universitetet i Oslo koordinerer prosjektet "NORA-HS: Norwegian graduate School for how AI impacts humanities and society"
- Universitetet i Bergen koordinerer prosjektet "Norwegian Research School in Global Health for Sustainable Futures"
Les meir om dei innvilga forskarskolane hos forskningsrådet.no.
