Med programmet «Forskingsleiing i partnarskap» ønsker OsloMet å kople strategiske samarbeidspartnarar endå tettare til seg, for å ta ei aktiv rolle i møte med nokre av vår tids største samfunnsutfordringar.
Ordninga blei pilotert – med stor suksess – hausten 2024. Det blir no opna for å søke om deltaking for hausten 2025.
Intelligente helseløysingar og utanforskap
Programmet i haust rettar merksemda mot to hovudområde der OsloMet allereie har større, tverrfaglege satsingar.
Det første området handlar om korleis intelligente helseløysingar kan motverke kapasitetsmangel i helsetenesta fram mot 2050. Her har universitetet si eiga satsing på intelligent helse gått føre seg i flere år.
Det andre hovudområdet tar for seg korleis samarbeid på tvers kan framme verksame grep og løysingar for å forhindre utanforskap hos barn og unge. Denne tematikken er peika på som ei særskild samfunnsutfordring i langtidsplanen for forsking og høgare utdanning, og har sidan i fjor også vore ei strategisk satsing ved OsloMet.
– Vi står ovanfor fleire store samfunnsutfordringar, blant anna knytt til helsesektoren og ungt utanforskap, seier Vibeke Telle-Hansen, fagansvarleg for programmet saman med Tale Skjølsvik.
– Samfunnsutfordringar er ofte komplekse og krev innsikt og forståing på tvers av fag og sektorar. Forsking gir kunnskap som er objektiv og etterprøvbar og er derfor nyttig og nødvendig for å løyse samfunnsutfordringar, seier Telle-Hansen.
Fellessamlingar og workshops
Programmet rettar seg mot forskingsleiarar og ansvarlege som vil at forskings- og utviklingsarbeidet deira skal bidra til reelle endringar og forbetringar i samfunnet. Det er eit klart mål at programmet skal bidra til samarbeid på tvers av institusjonar, og til å bygge nettverk av relevante partnarar.
Sølvi Helseth, professor ved fakultetet for helsevitskap, er initiativtakar til programmet. Ho meiner samarbeid på tvers er vegen å gå.
Forskingsprosjekt som skal løyse store samfunnsutfordringar føreset i aukande grad tett samspel mellom aktørar frå ulike fag, institusjonar og sektorar. Der universiteta tradisjonelt har hatt mest fokus på akademiske partnarskap, må vi no i større grad også etablere strategiske partnarskap med andre aktørar og organisasjonar utanfor akademia.– Sølvi Helseth
Frå august til november skal det haldast tre fellessamlingar over to dagar kvar, og dessutan workshops og læringsstøttande aktivitetar.
Reint metodisk vil ein jobbe med tverrgåande tema og bygge ut nettverket av partnarar på fellessamlingane, mens workshopane vil gi læringsgruppene høve til å teste ut tverrsektorielt samarbeid og leiing i partnarskap.
– Ein viktig byggestein
– OsloMet skal vere eit universitet det er lett å samarbeide med, men samtidig samarbeider vi ofte med omgivnadene våre om kompliserte årsakssamanhengar, seier prorektor for samarbeid og samfunnsforbetringar Carl Christian Thodesen.
Carl Thodesen håpar samarbeidspartnarar vil sjå nytta av å styrke eiga forskingsleiing i samarbeid med OsloMet. Foto: Marit Christiansen/OsloMet
– Det krev erfaring og felles forståing. Dette programmet vil gjensidig styrke både oss som universitet og forskingspartnarane våre, og vere ein viktig byggestein i det utoverretta arbeidet vårt, meiner Thodesen.
Erfarne forskingsleiarar vil dele erfaringar frå eige arbeid med å bygge forskingsmiljø og nettverk. Programmet, og overnatting for deltakarane, blir dekt av OsloMet.
