Prosjektet, som By- og regionforskningsinstiuttet NIBR ved OsloMet utfører i samarbeid med Statens vegvesen, skal undersøke korleis vegtrafikk påverkar ulikskap i byar.
For dei som får mest nytte av gode vegar, er ofte ikkje dei som plagast av støyen frå trafikken.
– Vi ønsker å auke forståinga for sosial ulikskap knytt til vegtransport. Det er viktig å vise korleis støy og luftforureining påverkar folks helse og livskvalitet, seier Anders Eika, forskar ved NIBR.
Folkehelse og bukvalitet
Over to millionar menneske opplever høge støynivå frå vegtrafikk. Dette rammar ofte same område som luftforureining. Begge delar kan skade helsa.
– I lys av at vi blir fleire og skal bu tettare, er det viktig å vite meir om kva som er viktig for folkehelsa og for å oppleve god bukvalitet, seier Regine Benz, seniorrådgivar i Klima- og miljøseksjonen i Statens vegvesen.
Forsking viser at tilgang til rolege og grøne område kan forbetre livskvaliteten.
– Tilgang til grøne og stille område kan gjere støyen mindre plagsam. Det kan vege opp for høge støynivå i nærleiken av eigen bustad, seier Eika.
Prosjektet ser derfor på forholdet mellom vegtrafikkstøy og luftforureining på den eine sida, og tilgang til stille uteområde og stille side i bustader på den andre.
Rettferdig fordeling
Transport equity, eller rettferdig fordeling av fordelane og ulempene til transporten, har blitt eit sentralt omgrep i byforsking.
Prosjektet vil vise forskjellar i støynivå, luftforureining og bukvalitetar rundt bustader for å gi eit betre kunnskapsgrunnlag for framtidig byplanlegging.
– Vi håpar å bidra til treffsikre tiltak for å redusere ulempene støy og luftforureining frå vegtrafikk påfører befolkninga, seier Mari Mamre.
Ho er forskar ved NIBR og arbeider på prosjektet saman med Eika. Ho legg til:
– Løysingar som reduserer støy og forureining er viktige for å skape meir rettferdige og berekraftige bymiljø.
Samfunnsansvaret til transportsektoren
Å få bukt med miljøulempene tilknytt transport har høg prioritet både i Nasjonal transportplan og i FNs berekraftsmål.
Statens vegvesen har derfor eit stort samfunnsansvar som vegeigar, vegforvaltar og planlegg.
– Statens vegvesen ønsker å få meir kunnskap for å kunne bruke resultata til utvikling av berekraftige framtidige løysingar for transport og planlegging i støyutsette område, seier Benz.
Prosjektet bygger vidare på tidlegare forsking om vegtrafikkstøy og sosial berekraft.
Nettsida viser korleis påverknaden av vegtrafikkstøy slår skeivt ut i befolkninga
– Vi skal fortsette å auke forståinga for sosial ulikskap knytt til vegtransport. På den måten kan vi lage meir rettferdige og berekraftige transportsystem, seier Mamre.
