– Det er ein stor sjukepleiarmangel over heile landet, ikkje minst i kommunehelsetenesta. Derfor opprettar vi ei ny og fleksibel deltidsutdanning på Romerike, fordi vi trur at fleksible studieløp kan opne OsloMet for nye grupper av søkarar, forklarer instituttleiar Ingrid Ruud Knutsen ved Institutt for sjukepleie og helsefremjande arbeid.
Fleksibelt studieløp
Utdanninga varer i utgangspunktet i seks år, men gir rom for at studentane kan velje å gjennomføre på kortare tid.
– Det er ikkje full fridom, men studentane kan byte til heiltid utover i studiet. Vi erfarer at mange ønsker å bruke meir tid på det tunge teoretiske førsteåret, for så å auke tempoet, seier Knutsen.
Praksisperiodar går på heiltid
Emne og innhald i programplanen er likt som i heiltidsløpet. Deltidsstudentane har både teori- og praksisstudiar saman med heiltidsstudentane, men gjennomfører færre emne per semester.
Praksisperiodane går derimot på heiltid, blant anna på grunn av logistikk og avtaler med praksisstadene.
– Om ein jobbar ved sida av studiet er det lurt å gjere avtaler med arbeidsgivar slik at ein får gjennomført praksisperiodane, som jo er obligatoriske, påpeikar instituttleiaren.
Same opptakskrav
Opptakskravet er generell studiekompetanse og gjeld både deltid og heiltid. Frå 2025 blir dessutan karakterkravet i norsk og matematikk fjerna for alle sjukepleiarutdanningar.
Søknadsfristen er 15. april. Ved OsloMet kan du no velje mellom tre studietilbod for å bli sjukepleiar.
Underskot på sjukepleiarar
I perspektivmeldinga 2024 (regjeringen.no), Meld. St. 31, side 76, står det at ifølgje Statistisk sentralbyrås berekningar er det venta eit underskot på nesten 54 000 sjukepleiarar og helsefagarbeidarar fram mot år 2040.
– Dette tilbodet kan nå ut til fleire som ønsker ei sjukepleiarutdanning, då den individuelle moglegheita for å finne balanse i jobb, familieliv og studiar er større enn det vi har sett ved andre deltidstilbod. Det seier Hilde Marit Mobråthen som er leiar for Utviklingssenter for sjukeheimar og heimetenester i Akershus.
– Det er spesielt nyttig for dei som allereie er etablerte og avhengig av inntekt. Eg trur også at denne måten å organisere studiane på kan redusere stress, ved at ein får god tid til å forstå fagstoff og til å finne «knaggar» for teorien i praksis.
– Dessutan er det veldig bra at dei som ønsker det kan gjere seg ferdig på kortare tid. Eg trur dette fleksible deltidsstudiet kan gi samfunnet fleire kvalifiserte sjukepleiarar, avsluttar Hilde Marit Mobråthen.
