– OEM er ein modell som vert innført i stadig fleire institusjonar i barnevernet. Evalueringa vil gi oss verdifull innsikt i korleis modellen fungerer i praksis, seier Trine Myrvold, prosjektleiar ved By- og regionforskningsinstituttet NIBR ved OsloMet.
Resultata frå evalueringa skal brukast i Bufdirs utvikling av det faglege innhaldet i institusjonstilbodet i barnevernet.
Omsorgs- og endringsmodellen
Fagmodellen Omsorgs- og endringsmodellen (OEM) tar utgangspunkt i behandlingsmetoden dialektisk åtferdsterapi, som er vidareutvikla for tilpassing til barneverninstitusjonar.
Dialektisk åtferdsterapi (DBT) er ei terapiform som hjelper menneske med å finne ein balanse mellom å akseptere sterke og vanskelege kjensler, og å forandre seg. Det blir også trena på å sette grenser, regulere kjensler, sette namn på kjensler og handtere stress.
Målet med terapien er at ein skal klare å tenke klart i situasjonar der ein kjenner seg overvelda.
Omtrent 30 prosent av Bufetats statlege institusjonsplassar er no ved ein institusjon som bruker OEM.
Brei evaluering
Evalueringa av OEM skal omhandle fire hovudtema:
- Bruken av OEM i barnevernsinstitusjonane: Korleis blir det arbeidd etter OEM, og korleis varierer praksis mellom institusjonane?
- Kjenneteikn ved ungdommane i OEM-institusjonane og ulike gruppers erfaring med modellen
- Kostnader knytte til OEM-institusjonane
- Samsvar mellom behovet til ungdommane og det faglege innhaldet i OEM-modellen
– Vi ser på både dei positive effektane og utfordringane ved å bruke OEM. Målet er å få fram kunnskap for å forbetre tilbodet og sikre at det møter behovet til ungdommane på best mogleg måte, seier Myrvold.
