Norske kommunar har dei siste åra busett eit rekordhøgt tal flyktningar, hovudsakleg frå Ukraina. Som ein del av satsinga på å integrere mange av dei i arbeidsmarknaden, har KS starta eit nettverk for å støtte og inspirere kommunane i arbeidet med å få flyktningar i jobb.
– Vi studerer nettverket med eit todelt formål. For det første skal vi evaluere og dokumentere sjølve nettverksopplegget og -prosessen. For det andre skal vi dokumentere og analysere arbeidet kommunane gjer med å få flyktningar i jobb, og betydninga av nettverksdeltakinga i så måte, seier prosjektleiar Trine Myrvold, forskar ved NIBR.
Forskarane frå NIBR skal observere nettverkssamlingar og gjennomføre intervju med prosjektleiarar og -deltakarar. I tillegg skal dei analysere skriftleg materiale som blir produsert i nettverket, inkludert arbeidsbøkene til kommunane og tilbakemeldingane deira på kvar enkelt nettverksaktivitet.
Prosjektet skal vere ferdig i august 2025.
– Målet er å bidra til framtidig suksess i integreringsarbeidet norske kommunar utfører, seier Myrvold.
