Ønskjer du å komma vidare i karrieren?

Kvifor ta etter- og vidareutdanning?

På grunn av dei store endringane i arbeidslivet, må noko av kompetansen din oppdaterast. Du må også vera førebudd på å bruka kompetansen som du allereie har, på nye måtar. Det var situasjonen i arbeidslivet før koronakrisa, og dette behovet har berre forsterka seg etter koronautbrotet.

Jobbar du i ein sektor der endringane er store, vil du som arbeidstakar kunne auka moglegheitene dine til å vera med på denne utviklinga og påverka endringane som skjer, og kanskje opnar det seg nokre nye og spennande dører på jobbmarknaden i framtida.

Start med å kartleggja dine interesser, og kva du ønskjer å få ut av studiane. – Cecilie Slettvoll Martinsen

Arbeidstakarar som har teke etter- og vidareutdanning, «opplever betre ferdigheiter og oppgir auka bruk av læringa si i jobb», ifølgje funn frå ekspertutvalet som vart utnemnt av regjeringa for etter- og vidareutdanning i 2019.

Deltakarane kjenner også auka sjølvtillit og meistringskjensle på arbeidsplassen og auka motivasjon for å delta i meir opplæring seinare.

Kva er forskjellen mellom etterutdanning og vidareutdanning?

Kort fortalt gir vidareutdanning deg formell kompetanse i form av studiepoeng og har ei eksamensform. Vidareutdanning kan vera nødvendig dersom ein ønskjer eit karriereskifte.

Etterutdanning er ofte kortare kurs som ikkje gir formell kompetanse, og som har som hovudmål å halda ved like og oppdatera den kompetansen du allereie har.

Både etter- og vidareutdanning gir deg høve til å utvida det profesjonelle nettverket ditt, noko du vil ha glede og nytta av i det vidare arbeidslivet ditt.

Kva studium skal du velja?

Start med å kartleggja dine interesser, og kva du ønskjer å få ut av studiane.

Er målet å bli betre i, eller fylla på kunnskap innan eit fagfelt du ønskjer å jobba med? Då er det viktig å finna ut kva kompetanse du ønskjer å styrkja for å nå målet.

Er målet ditt å byta jobb? Sett av god tid i prosessen og tenk igjennom kva som motiverer deg. Er planane samsvarande med privatlivet ditt og den balansen du ønskjer mellom jobb og privatliv?

Kva er viktig å tenkja på når du skal velja etter- og vidareutdanning?

Sett ord på og konkretiser innhaldet i jobben du ønskjer deg, og sjekk ut jobbmarknaden for den typen stillingar du ønskjer. På denne måten aukar du sjansane dine for å fullføra studia, for å få dei arbeidsoppgåvene du ønskjer deg og for at du vil trivast i jobben.

Når du skal velja ei utdanning, bør du først tenkja godt igjennom kva ønske du har for ein framtidig jobb. Ønskjer du å fylla på og vidareutvikla deg innanfor det noverande yrket ditt, eller ønskjer du deg eit karriereskifte?

Oppdater deg på kva arbeidslivet har behov for. Tenk gjennom dine eigne ønske og behov. Kartlegg kva som er viktig for deg, og kva som motiverer deg.

Bodil Innset og Cecilie Slettvoll Martinsen.

Korleis studera ved sida av full jobb?

Ta omsyn til livssituasjonen din når du vurderer etter- og vidareutdanning. Det vil krevja ekstra tid og energi frå deg som student.

Har du familie og full jobb kan det vera ein god ide å snakka med næraste familien og arbeidsgivaren din. Gjennom å forankra, og leggja ein god plan heime og på arbeidsplassen, vil det forhåpentleg gjera studietida di mindre krevjande og lettare å gjennomføra.

Ha god struktur og sett av tid i kalenderen til studium, jobb og privat.

Kan du få økonomisk støtte?

Ønskjer du å vidareutvikla deg innan eit fagfelt som vil vera positivt for arbeidsgivaren din, vil dette auka sjansane dine for å få økonomisk støtte.

Utdanning og kunnskap er ferskvare og blir fortare utdatert. Me må alle læra heile livet. Etter- og vidareutdanning er derfor viktigare enn nokon gong. – Bodil Innset

Førebu ein god presentasjon der du klargjer fordelane med å ta ein etter- og vidareutdanning. Kva du kan utretta og bidra med etter fullført etter- og vidareutdanning. Få også fram motivasjonen din for kompetansehevinga.

Mange arbeidsgivarar ser på etter- og vidareutdanning som ei god investering. Dette kan gi deg nokre gode, som til dømes fri til å studera i arbeidstida og hjelp til å finansiera studiane dine.

Vel du ei vidareutdanning som blir støtta av lånekassa, kan du som student søkja om lån og stipend. Hausten 2020 innfører Lånekassen (lanekassen.no) nye reglar for støtte som gir større fleksibilitet for vaksne og vidareutdanning.